Մայիսի 16-ին մեր դասարանը ուսուցիչների հետ կազմակերպեց քայլարշավ, որը դարձավ շատ հետաքրքիր և հագեցած օր։ Սկզբում նախատեսել էինք անցնել 5 կմ, բայց վերջում քայլեցինք մոտ 11 կմ, քանի որ եղանակային պայմանները փոխեցին մեր ծրագիրը։ Առաջինը բարձրացանք դեպի Հավուց Թառ։ Անձրև էր գալիս, և ճանապարհը բավականին դժվար էր․ հողը սայթաքուն էր, կոշիկները՝ ցեխոտ։ Որոշ հատվածներում իրար ձեռք էինք տալիս, որպեսզի ապահով անցնենք։ Մեզ ուղեկցում էին նաև շներ, որոնք ամբողջ ճանապարհին մեզ հետ էին։ Չնայած անձրևին՝ բոլորս լավ տրամադրությամբ էինք և փորձում էինք չտրտնջալ։ Վանք հասնելուն պես մի փոքր դադար արեցինք։ Նստեցինք, սնվեցինք և պարզապես վայելեցինք տեսարանը։ Հին քարե պատերը շատ ազդեցիկ էին և մեզ հիշեցնում էին, թե որքան հարուստ պատմություն ունի մեր երկիրը։ Այնուհետև իջանք դեպի մեկնարկային կետը։ Երբ արդեն հասանք, մի փոքր հանգստացանք և, տեսնելով, որ եղանակը բացվել է, որոշեցինք շարունակել օրը և գնալ նաև Աստղիկի ու Վահագնի ջրվեժներ։ Մեքենայով հասանք այն հատված, որտեղից սկսվեց երկրորդ փուլը։ Անտառային ճանապարհը շատ գեղեցիկ էր, բայց նաև փորձություններով լի։ Ամենահետաքրքիր մասը գետն անցնելն էր․ ծառի բունը մեզ համար դարձավ կամուրջ։ Սկզբում զգուշությամբ էինք անցնում, բայց ընկերների օգնությամբ բոլորս հաջողությամբ հաղթահարեցինք այդ հատվածը։ Երբ հասանք ջրվեժներին, բոլորս հիացանք։ Ջրի ուժեղ հոսքը, զով օդը և բնության ձայները ստեղծում էին շատ հաճելի մթնոլորտ։ Հոգնածությունը կարծես մոռացանք և երկար ժամանակ մնացինք այնտեղ։ Այդ օրը մեզ սովորեցրեց չվախենալ դժվարություններից, աշխատել միասին և գնահատել Հայաստանի բնության գեղեցկությունը։
Բարի Գալուստ Նատալի Տագեսյանի Բլոգ 